अनि साच्ची
थाहा छ ?
नयाँ किताबको पन्ना पल्टाउदाको बास्ना होसकी
नयाँ कापीको पन्नाको
बच्चा बेला गाता हाल्ने कागजको बास्ना
अनि सिसाकलम तिखार्दा झरेका काठको धुलोको बास्ना
आह! कति मिठो लाग्थ्यो
फाउनटेन कलम होसकी डटपेनको मसीको बास्ना
भूल्नै सक्दिन |
घरमा नयाँ वर्ष संगै आउने भित्तेपात्रोको बास्ना
वा
बिहानै आउने पत्रिकाको बास्ना
अनि बिहानै ममीले कमेरो अनि गोबरले लिप्नुभएको बास्ना
अजिब थियो तर गजब थियो
मनसुनमा झरीले भिजेको माटोको बास्ना
वा धानखेतमा वा तोरीबारीमा हावासंगैं बहने बास्ना
अनि हरियो मकैको घोगा नंग्यौदाको बास्ना
थाहा छ ?
दशैंमा बाले किनिदिनुभएको नयाँ लुगाको बास्ना
वा दक्षिणा पाउने कटकट गर्ने नयाँ नोटको बास्ना
अनि अक्षताको अबिरको बास्ना नि?
साच्ची जमराको सुबास ओहो!
तिहार आउँदा प्याटप्याट गर्दै पड्काउने बन्दुकको बारुदको बास्ना
होसकी सयपत्री अनि मखमलको बास्ना
ममीले पकाउनुभएको सेलरोटीको बास्ना
अनि अगरबत्ती र धुपको त कुरै छोडौं |
भान्छामा आगोको धुवाँको बास्ना
सबेरै हजुरबाले दुहुनु भएको दुधको बास्ना
वा हजुरआमाले पकाउनुभएको चियाको बास्ना
कति मिठा थिए
अनि काँचो सल्लाको चोप्को बास्ना
अनि कोलमा पिसेको तोरीको तेलको पिरो बास्ना नि
हासोंलाग्ने बास्नाको कुरा गरौँ ?
नाकै कालो बनाउने मट्टीतेलको टुकीबत्तिको धुवाँको गन्ध,
गन्ध के भनौ मलाई मनपर्ने बास्ना
यी अनि यस्तै अनेक थिए बालसुलभका मनपर्ने बास्ना
तर अचेल
तर अचेल बोत्तलमा भरिएको अत्तर अनि परफ्युम चलेकोछ बजारमा
पहिरिएर यसै मक्ख मान्छे यो दुनियाँमा
उमेरसंगै मिठो लाग्ने तर ठस्स गनाउने मदिराको बास्ना
तर खै त्यो बास्ना अनि यो अत्तर अनि यो मदिरा
फरक छ हजुर
अनि साच्ची तपाईलाईचैं कुन बास्ना मनपर्छ नि ?
Tuesday 12:00 AM
10th May 2022, Beaverton, OR
